خبر

بين الخالق عفو تشکيلاتی صالح کامرانی حاقدا مراجعت درج ائديب.

 220 ژورناليست ايران پرزيدنتی احمدی نژادی سوز آزادليغی اوچون امکان ياراتماغا چاغيريب.

آسمک آذربايجان ديللی ژورنال لارين باغلانديغينی بيلديرير.

اوچ اهواز عربی اعدام اولوب.

 آذربايجان فعالی مهدی نوری يه 7 ايل حبس جزاسی وئريلدی.

 دانشجو عسگر اکبر زاده 86 گونلوک حبس دن سونرا آزادليغا بوراخيليب.

اطلاعات آذربايجان ديلينين تبليغينه قاداغا قويوب.

 

بين الخالق عفو تشکيلاتی صالح کامرانی حاقدا مراجعت درج ائديب.

بين الخالق عفو تشکيلاتی ايران- آذربايجانليلارينين حقوقلاری ايله باغلی گئنيش کمپين چرچيوه سينده نوبتی بياناتينی وئريب. بو بيانات دا انسان حاقلاری مدافعه چيسی وکيل صالح کامرانی نين قانونسوز حبسی و حبس دن آزاد ائديلديکدن سونرا دا اوزونون و عائيله سينين تعقيب لره معروض قالديغی گوستريريلير. خاطرلاداق کی، جولايين 14 ده حبس اولونان صالح کامرانی اوچ آی دان آرتيق زنداندا قالميش و اونا اوزون مدت وکيلی و عائيله سی ايله گوروش امکانی وئريلمه ميشدی. بين الخالق عفو تشکيلاتی صالح کامرانی نين حبس دن آزاد اولوندوقدان سونرا وکيل ليک له مشغول اولماق حقوقوندان محروم ائديلمه سينی و دائمی تضييق آلتيندا اولماسينی يول وئريلمز سايير و بين الخالق اجتماعيتی بونونلا باغلی ناراضی ليغينی بيلديرمه يه چاغيرير.

 

220 ژورناليست ايران پرزيدنتی احمدی نژادی سوز آزادليغی اوچون امکان ياراتماغا چاغيريب

 ” مئديا فورم” سايتی نين وئردييی معلوماتا گوره 220 ايران ژورناليستی آزاد مطبوعاتين و مستقل ژورناليست لرين فعاليتينه محدوديت لرين آرادان قالديريلماسی ايسته يی ايله ايران پرزيدنتينه مراجعت عنوانلاييب. مراجعت ده سون زامانلار ايرانين اولکه وزارتخاناسی نين ژورناليست لره قارشی تضييق لری آرتيردديغی وورغولانيب و باش وئرن لرين مئديا نماينده لرينين ناراحاتليغينا سبب اولدوغو بيلديريليب. …

آسمک آذربايجان ديللی ژورنال لارين باغلانديغينی بيلديرير.

 ايراندا گيزلی شکيلده فعاليت گوسترن” آذربايجان سياسی محبوس لارينی مدافعه کميسته سی- آسمک- ين وئردييی معلوماتا اساسا آذربايجان تورکجه سيندن نشر ائديلن” ايلديريم” و ” بيرليک يولو” ژورنال لارينين باش يازی غلامرضا نصيرزاده ماکی شهرينين محکمه سی طرفيندن حاکم رژيمه قارشی چيخماق و ” پانتورکيست” گروهلارلا امکداشليق اتهامی ايله 6 آی حبسه محکوم ائديليب. نصريزاده بير نئچه آذربايجان کتابی و ژورنالی داشيديغی اوچون تهلوکه سيزليک اداره سينين امکداشلاری طرفيندن جولای آييندا گوز آلتينا الينميشدی. آسمک همده بيلديرير کی، اروميه دانشگاهی نين ئويرنجی لری طرفيندن نشر ائديلن ” آياتای” اويرنجی ژورنالی نين نشری دايانديريليب. اسمکين سوزچوسو عليرضا قولونجو ايسه سون 3 آی دا ” اولوس”، ” اويانيش”، “هارای” و ” ياشيل يول” کيمی ژورنال لارين باغلانديغينی بيلديريب.

اوچ احوازلی عرب اعدام اولوب.

 ايرانين خوزستان ايالتينده باره سينده اولوم حوکمو چيخاريلميش 10 عرب ملت چی سينين اوچ نفری دسامبرين 19 دا اعدام ائديليب. مئديا فورم سايتی نين معلوماتينا گوره، بو باره ده خبری ايرانين خوزستان ايالتی نين باش عدليه اداره سی نين معلومات شعبه سی ياييب. اعدام شريعت قانونلارينا اويغون اولاراق اجرا ائديليب. عرب لر ئوتن ايل خوزستان ايالتينين مرکزينده – احواز شهرينده پارتلاييش تورتمکده گناهکار بيلينيرلر. همين پارتلاييش دا بير نئچه نفر ئولوب 10 لارلا آدام يارالانميشدی. حادثه يه گوره عمومی ليک 16 عرب ملتچی سی مسئوليته جلب اولونوب. اونلارين 9 نفری حبس و سورگون له جزالانديريليب.

 

آذربايجان فعالی مهدی نوری يه 7 ايل حبس جزاسی وئريلدی.

 

 کانادالی انسان حقوقلاری مدافعه چيسی خانيم فاخته زامانی نين آمريکا سسی نين آذربايجان سرويسينه وئردييی معلوماتا گوره، اورميه انقلاب محکمه سی آذربايجانلی اويرنجی- دانشجو مهدی نوری نی 7 ايل آزادليقدان محروم ائديب. مختلف مئديا بلاگ لارينين وئردييی معلوماتا گوره م. نوری ايلک دفعه بو ايلين مای- ژوئن آيلاريندا کئچيريلن اعتراض لار زامانی توتولوب و بير مدت سونرا آزاد ائديليب. او داها سونرا ايکی دفعه تبريز ده بير دفعه ايسه سولدوز دا حبس ائديليب و حبس ده اولارکن مختلف فيزيکی و روحی شکنجه لره معروض قاليب. مهدی نوری 80 گون تک سلولی زنداندا ساخلانديقدان سونرا سپتامبردا آزادليغا بوراخيلميشدی.

 دانشجو عسگر اکبر زاده 86 گونلوک حبس دن سونرا آزادليغا بوراخيليب.

اردبيل لی اويرنجی، بو ايلين اکتبر آييندا مکتب لرده تورک ديلينده تدريس ايسته يی ايله اعتراض لار زامانی توتولموش عسگر اکبرزاده86 گون حبس ده ساخلانديقدان سونرا آزادليغا بوراخيليب. عسگر اکبر زاده دسامبرين 20 ده 7 مين دلار گيرو قويماقلا آزادليغا چيخيب.

 

اطلاعات آذربايجان ديلينين تبليغينه قاداغا قويوب.

 

مئديا فورم بيلديرير کی، اطلاعات-ين گونئی آذربايجانين خوی شهرينده کی بولمه سينه يئنی جه باشچی تعين ائديلن کريمی آدلی شخص شهرين ملی فعال لارينی اطلاعاتا چاغيراراق اونلارا تورک ديلی نين تبليغ ائتمه مک باره ده هشدار وئريب. عکس حالدا او، ملی فعال لارلا سرت دواراناجاغينی بيلديريب.